UL’vovo udalula impilo yakhe ngemuva kwesifo sohlangothi
Inkakha yomculo weKwaito, u-L’vovo Derrango, isivule isifuba yakhuluma ngobunzima obaguqula impilo yayo ngesikhathi ihlaselwa yisifo sohlangothi.
Ithi lokho kwacishe kwaqeda umsebenzi wayo emculweni, futhi wacishe wafa.
UL’vovo, ogama lakhe langempela kunguThokozani Ndlovu, uthe konke kwashintsha ngosuku awawa ngalo esiteji ngesikhathi ezocula emcimbini.
Waphuthunyiswa esibhedlela lapho achitha khona amasonto amaningi egunjini labagula kakhulu (ICU), elwela ukuphila.
Lesi sifo samenza wangakwazi ukukhuluma kahle, wahluleka ukuqhubeka nomculo futhi waphelelwa yimali njengoba engasawatholi amathuba okucula.
“Angikaze ngicabange ukuthi impilo yami ingashintsha ngomzuzwana owodwa,” kusho u-L’vovo Derrango.
“Kwakukhona izinsuku engangizibuza ukuthi ngiyoke ngiphinde yini ngime esiteji.
“Kodwa uNkulunkulu wanginika elinye ithuba, mina ngakhetha ukulwela ukuphila nsuku zonke.”
Uveze ukuthi ubuhlungu bokungabi namali babunzima njengokululama emzimbeni.
“Ngahlupheka kakhulu ngokwezimali ngoba ngangingasasebenzi futhi ngingasazitholi izimemo zokuyodlala.
“Ngaze ngabuyela ekhaya. Ngangesaba ukuphuma ngoba ngangingafuni abantu bangibuke bengizwela.
“Abangani bami bangempela babengiphekela futhi benginakekela, kodwa baningi engabalahlekelwa.”
Lo mculi uthe wasuka emehlweni abantu ngesikhathi ezama ukubuyisela impilo yakhe esimeni esifanele.
“Ngangingafuni abantu bangikhumbule ngisesimweni esibuthaka. Bengifuna bangibone sengikulungele ukuphinde ngiqale impilo.”
Namuhla uL’vovo uthi ukusinda kwakhe kuyisimangaliso futhi usuphila impilo entsha.
“Ngingomunye wabambalwa abaphume bephila e-ICU bakwazi ukuxoxa indaba yabo.
“Lena yimpilo yami yesibili. Manje sengidla ngendlela efanele, ngiyaphumula, ngiyazinakekela futhi ngibonga zonke izinsuku uNkulunkulu angipha zona.”
OLUNYE UDABA: Ifike kahle iTata Tiago abantu beyidinga
U-L’vovo Derrango uthi ukubuya kwakhe akukhulumi ngomculo kuphela, kodwa kumayelana nokunikeza abanye ithemba.
“Uma indaba yami ingakhuthaza umuntu oyedwa ukuthi angapheli amandla, konke engidlule kukho kuzobe kungazange kube yize,” usho kanje.
- EZISHISAYO| Cofa lapha usithole kuWhatsApp
