Owayeyi‘sancinza’ seSilo uSihle Sibisi usisola ‘ngodlame’
Inkosazane eyake yathi yayiyisancinza seSilo uMisuzulu kaZwelithini, manje esingumethuli wezinhlelo kwiMoja Love, uSihle Sibisi, seyihlasele kanzima iSilo nomndeni waseNdlunkulu.
Lokhu kulandela ukusabalala kwevidiyo ekhombisa iSilo sithethisa iNdlovukazi uNomzamo “Mdolomba” uMaMyeni Zulu.
Le vidiyo, esabalale ngesonto eledlule, ikhombisa iSilo sithethisa uMdolomba siphethe okubonakala kuyibhodlela lotshwala, okudale ukukhuluma ezinkundleni zokuxhumana.
U-Sihle Sibisi wake waveza ukuthi wayenobudlelwano bothando neSilo futhi wake wasabalalisa ividiyo yaso sisembhedeni.
Uthi ungumngani omkhulu kaMdolomba futhi waya nasemshadweni wakhe neSilo.
Ekhuluma kuTikTok, lo msakazi wezinhlelo iFake Pastors neFake Marriages uthi iSilo sihlukumeza abantu besifazane.
Uthi sidinga ukuyiswa esikhungweni sokuhlunyeleliswa kwezimilo kunokuthi sivikelwe ngenxa yesikhundla saso.
“Lo muntu udinga usizo. Asibeke eceleni ukuthi uyiSilo, sibhekane naye njengomuntu. Uhlukumeza abantu besifazane,” kusho uSibisi.
Uthi ukube lokhu kwenziwe yindoda ejwayelekile, izinhlangano ezilwela amalungelo abantu besifazane ngabe sezifuna iboshwe.
USihle uthi ukuvikela iSilo ngenxa yobukhosi baso kuthumela umyalezo ongemuhle entsheni.
“Kukhona abafana ababuka iSilo njengomuntu oyisibonelo. Bangacabanga ukuthi lokhu kulungile ngoba kwenziwa yiSilo,” kuqhuba yena.
- OLUNYE UDABA: iZwi loMzansi libuyisa umlingisi emoyeni
U-Sihle Sibisi uthi impi yokulwa nodlame olubhekiswe kwabesifazane ngeke iphumelele uma abanye bevikelwa ngenxa yezikhundla zabo.
- EZISHISAYO| Cofa lapha usithole kuWhatsApp
