Umama kaLondie London uvule isifuba ngobudlelwano babo
Uhlelo oluveza impilo yangempela iLife With Londie London luyaqhubeka nokunikeza ababukeli ithuba lokubona impilo yalo mculi nosomabhizinisi u-Londie London njengoba ezama ukwakha kabusha impilo yakhe.
Lolu hlelo oludlala njalo ngoLwesine ngo-8 ebusuku kuMzansi Magic lulandela uLondie, lukhombise impilo yakhe yansukuzonke.
Omunye wabantu asebethandwe kakhulu ngababukeli balolu hlelo ngumama wakhe, uDudu Zulu, odume ngokweluleka okuqotho nobuhlakani bakhe.
Ekhuluma engxoxweni neMzansi Magic, uDudu uthe wavuma ukuvela kulolu hlelo ngoba efuna ukweseka indodakazi yakhe.
“Ngavuma ngoba ngangifuna ukweseka indodakazi yami. Uhlelo olunjena lumfanele.
“Luhambisana nobuntu bakhe futhi lubukeka njengobizo kunokuba kube umsebenzi nje,” kusho yena.
Uthe kusamxaka ukuzibona kumabonakude. “Ukuzibona kuthelevishini kuyangixaka ngoba angikaze ngicabange ukuthi ngelinye ilanga ngizovela kuwo.”
UDudu uphinde wachaza indodakazi yakhe u-Londie London njengesibusiso empilweni yakhe.
“Uyisibusiso esikhulu. Ungumuntu omangalisayo futhi ngiyambonga uNkulunkulu ngokungikhetha ukuba ngumama wakhe,” kuqhuba yena.
Uthe wayazi kusukela esemncane ukuthi uLondie uhlukile kwabanye.
“Kusukela ngosuku azalwe ngalo wayenamandla amaningi futhi enothando lwezinto engangingazazi.
“Wayelokhu engimangaza. Ngangazi ukuthi uhlukile, kodwa angikaze ngicabange ukuthi uzofinyelela kuleli zinga.”
UDudu uthe umsebenzi wakhe omkhulu kube ukuqinisekisa ukuthi indodakazi yakhe ihlala izithobile naphezu kodumo.
“Ngenxa yezimiso engiphila ngazo, bekulula ukumgcina ezithobile. Uyazi ukuthi ngihlale ngimnika iseluleko esiqotho.”
- OLUNYE UDABA: Umbango ngomngcwabo wowodumo kwiGenerations
Uthe ubudlelwano babo bakhiwe uthando, ukwethembana nokuhloniphana.
“Mina ngiyinsika yakhe enkulu. Ngiyamkhulekela futhi angangishayela noma phakathi kwamabili. Ngihlala ngikhona kuye.”
I-Life With Londie London idlala njalo ngoLwesine ngo-8 ebusuku kuMzansi Magic.
- EZISHISAYO| Cofa lapha usithole kuWhatsApp
