UMinnie ulindele ‘ukuhlekwa’ ngokwehlukanisa nomyeni
Usaziwayo wakuleli ophinde abe ngumethuli wezinhlelo kumabonakude, uMinnie Dlamini useveze ukuthi kungcono ukuhambela izinhlelo zokwelulekwa ngomshado kunokwehlukanisa.
Le ntokazi yaseThekwini isanda kwehlukanisa nobengumyeni wayo, uQuinton Jones kanti kumanje kuvela ukuthi usamondla lo mfokazi.
UMaDlamini uveze ukuthi kungcono ukuhambela izinhlelo zokwelulekwa kunokuthi uqoke ukwehlukanisa.
Ubekhuluma ngesikhathi kwethulwa uhlelo la kuzobe kuhlekiswa khona ngaye olubizwa ngeRoast Of.
Lolu hlelo, oluzoqoshwa ngaphansi kweShowmax ngomhla ka-5 kuMbasa, luzokhonjiswa kumabonakude ngomhla ka-26 ngenyanga efanayo.
“Ngijabule kakhulu,” kusho uMinnie Dlamini kwabeCitizen ngesikhathi kwethulwa izinhlelo zalolu hlelo eRosebank kuleli sonto.
“Ngicabanga ukuthi sekuphele iminyaka emibili ngigconwa ezinkundleni zokuxhumana.
“Akukho okungashiwongo ngami. Ngakho ngikujabulele ukuthi kwenziwe ihlaya, ngizihleke.
“Ngijahe nokubona ukuthi bazowathini amahlaya abo ngempilo yami,” kuqhube yena.
UMinnie uyazi ukuthi iningi lamancoko azokwenziwa ngomshado wakhe owaphelela ekutheni ahlukanise nomyeni.
“Ngicabanga ukuthi ukwehlukanisa kwami kuzoba yisihloko esiphambili.
“Vele yiyona into abantu abebelokhu beyenza inhlekisa ngempilo yami.”
UMinnie, okhulele kumabonakude uke wajola nonozinti weKaizer Chiefs u-Itumeleng Khune futhi bahlukana kabi.
UKhune wabe esejola noSbahle Mpisane owayengumngani kaMinnie ngaleso sikhathi.
Yize owakhe uphelele ekutheni ahlukanise, uthi ngenxa yesibonelo esihle sabazali usakholelwa emshadweni.
Abazali bakhe bahlanganise iminyaka engu-35 beshadile. UMinnie yena uneminyaka engu-33.
“Ngisakholelwa emshadweni. Abazali bami bahlanganise iminyaka engu-35 beshadile nonyaka.
OLUNYE UDABA: UNasty C ukhiphe imfihlo ngonina egubha elokuzalwa
“Ngakho anginankinga nakho. Ngicabanga ukuthi umshado yinto enhle. Ukwelulekwa kungcono kunokwehlukanisa.”
