Usolwe ngobuthakathi, wacikeka waduba uMorena Ramoreboli
UMorena Ramoreboli, ongumqeqeshi weJwaneng Galaxy yaseBotswana uqhubekile nokugila izimanga ngaleli qembu lakhe kwiCaf Champions League eshiya kukhalwa eMorocco.
IGalaxy isidlala esigabeni samaqoqo kulo mqhudelwano, kanti ifike kuso ngokuwashisa izinkunzi zakuleli i-Orlando Pirates ijezi.
Ishiye kukhalwa eMorocco ngemuva yokuguqisa izinkunzi zakhona iWydad Athletic kungazelele muntu.
EzikaMorena Ramoreboli zikhombisile ukuthi ukushaya kwazo iPirates kwakungekhona ukuthi kuthuke ucilo ezishayisa endukwini.
Zimangaze iWydad, engenye yamaqembu abhekiwe kulo mqhudelwano, iyishayela ekhaya ngo 1-0. Igoli lishaywe uThabang Sesinyi ngomzuzu ka-33.
Nokho izimanga azigcinanga enkundleni nje kuphela njengoba nasesithangamini nabezindaba kusuke esinye.
UMorena Ramoreboli, ongowokuzalwa lapha eNingizimu Afrika, udubile washiya, ekhala ngokweyiswa yizintatheli zaseMorocco.
Lokhu kwenzeke ngemuva kokuthi enye imtshele ukuthi ujabule nje impela ebe azi ukuthi banqobe ngomuthi.
“Wena awunabo ubulungiswa. Ngishilo ukuthi bebezivocavoca belungiselela umdlalo,” kusho lo mqeqeshi.
Ubebonakala ukuthi usecikekile ngoba ubebuzwa ngento eyenziwe abadlali bakhe ngaphambi komdlalo laba baseMorocco abathi ubuthakathi obuthile.
“Usuyangeya ke manje. Uthi sinqobe ngoba sisebenzisa umuthi? Musa nje ukuseyisa ngaleyo ndlela.”
Ube esesukuma ephuma, waxolisa kwintokazi ebiphethe uhlelo, ethi, “ngiyaxolisa kodwa ngeke ngihlalele umuntu okhuluma kanje.”
Lezi zinkulumo kufanele ukuba zizowenza ube lula umsebenzi kaMorena Ramoreboli uma sekudlalwa umdlalo womlenze wesibili eBotswana.
Akungabazeki ukuthi abadlali bakhe bazofuna ukuphinde bayizwise ubuhlungu iWydad, ukukhokhisela umqeqeshi wabo.
Lo mdlalo uyoba ngoFebhuwari 23 ngonyaka ozayo, eBotswana National Stadium.
OLUNYE UDABA: IKaizer Chiefs ibhekene nezinkinga zokungenzwani eqenjini
IGalaxy yiyo ehlezi eqhulwini kuGroup B ngamaphuzu amathathu. Amanye amaqembu akuleli qoqo, i-Asec Mimosa neSimba SC abambane ngo 1-1.
